Dunchi d'umbra parru chi a luci 'nsi cunveni

mundu nigru purtusu scuru ricoviru a taddariti

unni erbi urfini aspettanu stiddazzi

e annacanu rusignoli annurbati di sonnu

clamanti dei 'nta l’ assummuru

stanchi  di camin nuvuli 'nta l'aria

appujati a fraschi amari

 

in chillu mundu di nani jimmuduti

chi satannu currunu a finestri chi suli nun vasavu mai

petri allimarrati stritti'bbrazzarilippicurdari

celu funnu chi pruvuli arrimina e salanitru

'mmenzu a fumu di sulfaru e quarari

attisa longu sirpenti peddi strazzata spina 'ngrata

 

mundu di jabbi e maravigghi unni lu babbu fa vita di re

e jetta cinniri stutata 'ntra culichi vaneddi baddatura

unni chianci cancillatu 'ncriaturu sigghiuzzìa

mancia li jita 'ntravarda ad occhi storti

toppa chiavi triccentu dulurusi magghi di catina

 

mundi stizzani all'allammicu grutti crastuna ligna sicchi

spini di porci mennuli agghiazzati carrubbi sdisiccati

ossa di cani scifi rutti fulìnii nivirumi

nira di surgi cilesti tiraciati còzzili di petra 'ngialinuti

ferri 'nterra d'armali scafugni putìa senza stigghi

vacanti disìu  jocu d'addevi 'ntra tempu e morti

mutu chi parra orbu chi torna a vidi e cridi

undi chiamatu surdu ha sintutu undi bussatu mugnu hagraputu

ciunchi sbalancanu porti sfermunu catinazzi

pensanu aggruppati ritorni a la petra a la sustanza

disiu di morti materia amata 'ngrata

rrèpitu vicchiania putenzia vuluntati pisi musurati

 

cori di ciuri unni lapi sucanu meli

cuvernanu lu fucularu di lu munnu

abbissi calati genti cascati 'ntra fossa

grutti pirreri cavi capanni spilonchi ripari

unni si 'mpara a ricurdari pauri cuntrari

cordi d'ala gruppa cavigghiuna

 

scinniri 'unn'è cascari

tempu rummulìa vacantarei agghiutti squagghiati

la terra si movi 'ntra la panza di 'nvermu  chi s'a manciàu

chi ora dormi

 

'nganna cu' 'ngannau  rrobba cu' rrubbau

attacca cu attaccàu malata cira

chi la morti ammazza e vasa 'nfami

'nta chicchìi di menzi lingui gnesti

 

nuvuli sulitari chiovunu dintra puzzi

unni dormunu picciriddi chi nun trovanu cchiù matri

petri 'mmenzu a gallarei seicentu scali

scaluna chi scecchi trasinu ppi cura

rospi vacertili scursuna s'affaccianu a barcuna

cuntannisi passati carusati 'nta mundi di carni

ccu' casi quantu scorci d'ova braci panzi di cucuzzi addumati

 

cordi 'ntrizzati criaturi spartuti

nira vacanti 'ntra timuri e canti

 

niviri jìsini chi talìanu a siccu

pisci nichi chi mancianu li cchiù granni

fimmini chi s''ntrizzanu capiddi ccu li spini

chi caminanu a testa sutta luni cudi di sireni

'mmenzu a scali di lignu stinnicchiati 'nterra

negghi sprocchianu ricordi spranzi simigni ggigghiati

 

si spogghia lava s'asciuca e torna a vèstiri cu va

a chillu mundu di virità