Ti susi la matina menzu ‘ntontu

e viri la tò umbra agghiazzata accantu

nun sai s’è majaria oppuri è nu priccantu

ma ti cc’ aggrappi ‘u stissu  e ti passa ‘u scantu

 

Ti stiri tuttu paru arripigghi la to’ lena

T’ammiri n’ta lu specchiu la to’ facci strana

E resti ccu' lu dubbiu si è stima o pena

Si la to’ menti è tràccula o puramenti sana

 

Ti n’saji ddi quattru pagghiazzeddi

Cci duni n’allisciata a li capiddi

Ah! E ti metti lu ciauru sutta l’asciddi

E sì prontu ppi furriari di la vita li vaneddi