Stasira è troppu friddu lu tò ciatu

dimmillu gioia mia cc'ha' succidutu

si è pirchì ju partu t'ha scurdatu

lu beni ca finora t'haju vulutu ?

 

Pirchì lu cori batti troppu forti

si è chista la vintura ca n'ammatti

si ju vaju ppi canciari chista sorti

pirchì 'nta l'occhi toj c'è la mè morti?

 

Ciatuzzu beddu miu ti staju lassannu

lu trenu di lu suli sta partennu

si chianci ancora ju mi staju pirdennu

'nnu' viri ca 'u me' cori sta ristannu?

 

Sulleva amuri miu ss'ucchiuzzi beddi

aggiustiti 'nmumentu li capiddi

na' casa ju t'accattu 'ntra li stiddi

pensu sempri a ttia e a li picciriddi !